Сагаалганай ʏреэлнʏʏд

Уг изагуурhаа Сагаан hарын ʏедэ буряад арад зон бэе бэедээ hайхан ʏгэнʏʏдые -ʏреэлнʏʏдые ʏреэдэг байhан. Yреэлнʏʏд элдэб удхатай байдаг: hургаал зааhан, хʏн зондо элʏʏр бэе, зол жаргал хʏсэhэн, амжалта ʏреэhэн байдаг гээшэ.

Мʏнѳѳ танай анхаралда ʏибʏʏдтэ ссэжэлдэхээр ʏреэлнʏʏдые ба «Челлендж - Yреэл» дурадханабди:

Хүндэл адли хүн боложо,

Хүлэгтэл адли жороо боложо,

Арадтаа алдартай

Зондоо суутай ябахатнай болтогой.

 

Хото хүдѳѳдэ – хаанашье

Хонин тѳѳлэй, сагаан эдеэн

Элбэг дэлбэг болог лэ.

 

Буряад заншалаа алдангүй,

Адууhа малаа үдхэжэ,

Амгалан тайбан жаргагты.

 

Таа бүгэдэндэ энхэ элүүрые хүсѳѳд,

Ажалдатнай амжалта,

Гэр бүлэдэтнай зол жаргалые хүсѳѳд,

hанаhан хэрэгтнай hайнаар бүтэг!

Бодоhон бодолтнай буянтай байг!

 

Сагаан хүhан сэргэдэмнай

Сагаалгамнай ерээд буугаа.

Сагаан сэдьхэлhээ таа бүгэдэндэ

Сагаалганаймнай амар мэндэ!

 

Даагантнай далантай,

Буруутнай булшантай

Ондо орожо байг лэ!

 

Далай шэнги ехэ,

Дайда шэнги үргэн ябагты.

Булаг шэнги

Амар амгалан hуугты.

 

Эжы абынгаа дайдада

Эзэн боложо ябагты!

Түрэhэн гараhан нютагаа

Түүрээн магтан ябагты!

 

Yргэн дайдадаа ябахадаа

Дүрбэн зугѳѳ дурдажа

Дуулим hайхан дуугаараа

Дуулан, дуулан ябагты.

 

Гаража ерэhэн бар жэлдэ

Газар дайдамнай үрэжэлтэй байг лэ!

Хүн бүхэн элүүр энхэ

Хүнгэн солбон ябаг лэ!

Гэрээртнай дүүрэн гэрэл бадараг,

Альгаартнай дүүрэн ажал бадараг.

 

Эжы абын буянгаар,

Орон дэлхэйн үргэмжѳѳр

Олзотой, омогтой

Yнэр баян, жаргалтай

Ажаhуухатнай болтогой!

 

Алтан шаргал наранай элшэ доро

Амгалан тайбан hуухатнай болтогой!

 

Амгалан тайбан дэлхэйн

Хүрьhэн дээрэ

Аба эжын буянгаар

Аза  жаргалтай hуухатнай болтогой!

 

Далай шэнги долгилжо,

Дайда шэнги сэсэглэжэ ябагты!

 

Булагай уhандал адли

Тунгалаг сэдьхэлтэй ябаарайгты!

 

Альгаартнай дүүрэн жаргал бадараг!

Гэрээртнай дүүрэн ажал бадараг!

Ѳѳрын hайхан дайдаяа

Хѳѳрэн дуулан ябаарайт,

Түрэhэн, гараhан нютагаа

Түүрээн магтан ябаарайт!

 

Баабайнгаа нютагта

Баян боложо,

Эжынгээ нютагта

Эрхим боложо ябагты!

Ccылка на видео